Seolfaidh Glór na Móna feachtas tiomsaithe airgid s’acu, Croí na Carraige, i gCeanada
Beidh eagraíocht cheannródaíoch óige agus pobail as Baile Uí Mhurchú in Iarthar Bhéal Feirste ag tabhairt a bhfeachtas tiomsaithe airgid go Ceanada an tseachtain seo chugainn le himeacht suntasach i Hurley’s Pub, Montréal, ar an Déardaoin 12 Márta, mar chuid de mhí na glasa i gCeanada. Is eagraíocht é Glór na Móna a bhfuil duaiseanna bainte agus aitheantas idirnáisiúnta tuillte aige mar eagraíocht spleodrach, pobalbhunaithe, atá dírithe ar an óige agus atá tiomanta chun an Ghaeilge a lárnú sa tsaol laethúil agus chun chur chuige ón bhun aníos a chur chun cinn le dul i ngleic le bunchúiseanna agus le tionchar creimneach an tráma thrasghlúnaigh agus na bochtaineachta struchtúraí.
Chomh maith le bheith chun tosaigh in obair óige trí Ghaeilge, ag soláthar do na céadta duine óg faoi mhíbhuntáiste gach seachtain, bhí Glór na Móna chun tosaigh i bhforbairt eacnamaíochta áitiúil, in oideachas pobail agus i dtógáil gluaiseachtaí, agus ról lárnach aige i bhfeachtas rathúil An Dream Dearg ar son Acht Gaeilge sna sé chondae. Tá an eagraíocht i gcroílár líonra níos leithne d’eagraíochtaí atá dírithe ar athbheochan eacnamaíochta agus teanga, agus faoi láthair tá uachtaránacht Chonradh na Gaeilge aige. Ag tógáil ar obair Ghael-Ionad Mhic Goill a thóg Glór na Móna i mBaile Uí Mhurchú in 2016, samhlaíonn a dtionscadal nua, Croí na Carraige, ionad ilchuspóireach don óige, don phobal, don teaghlach agus don oidhreacht ar an láithreán folamh millteanach taobh leo.
Ag labhairt dó faoin réasúnaíocht taobh thiar den fheachtas tiomsaithe airgid, dúirt Stiúrthóir Feidhmiúcháin Ghlór na Móna, Feargal Mac Ionnrachtaigh:
‘Táimid ag tiomsú airgid faoi láthair d’ionad nua óige agus pobail lán-Ghaeilge darb ainm Croí na Carraige, i mBaile Uí Mhurchú in Iarthar Bhéal Feirste. Is pobal faoi mhíbhuntáiste é a d’fhulaing go mór le linn na coimhlinte sna sé chondae agus ní ligeann na háiseanna atá againn faoi láthair dúinn na seirbhísí riachtanacha a sheachadadh atá de dhíth agus atá tuillte ag ár bpobal, mar atá léirithe anseo. Tá cead pleanála iomlán againn ionad óige, pobail agus oidhreachta a thógáil ar an láithreán – Croí na Carraige. D’éirigh linn £1.1 milliún de chistí caipitiúla a fháil, agus £500,000 de sin ó Chomhairle Cathrach Bhéal Feirste ar leo an talamh agus a bhfuil foireann deartha i bhfeidhm acu. Tá maoiniú againn freisin ó Chiste Infheistíochta na Gaeilge. Tá Céim a hAon den fhoirgneamh ag teacht isteach ag £1.6m, mar sin tá easnamh £500k orainn. Sin an fáth a bhfuil ár bhfeachtas tiomsaithe airgid féin á sheoladh againn i gCeanada chun dul i dteagmháil leis na Ceanadaigh Éireannacha chun cuidiú linn ár bhfís do dhaoine óga Iarthar Bhéal Feirste a fhíorú.
‘Táimid ag iarraidh ar phobal Éireannach Cheanada i Montréal tacú lenár n-imeacht tiomsaithe airgid i Hurley’s Pub ar 12 Márta. Cluinfimid ó chomhbhunaitheoir Ghlór na Móna, Uachtarán Chonradh na Gaeilge agus aoichainteoir na hoíche, Ciarán Mac Giolla Bhéin. Tá ról s’aige san ócáid tráthúil i ndiaidh chinneadh stairiúil ag Ard-Fheis Chonradh na Gaeilge le déanaí i mBéal Feirste a mBunreacht a athrú chun ligean don eagraíocht feachtasaíocht a dhéanamh go gníomhach ar son Éire Aontaithe. Beidh siamsaíocht againn fosta ó scoil cheoil thraidisiúnta Siamsa agus ón bhanna traidisiúnta iontach, Gráinne.
‘Tá Glór na Móna fréamhaithe san fhealsúnacht réabhlóideach le fáil i mana cáiliúil Bhóthar na Seoige i mBéal Feirste, “Ná habair é, déan é!” agus seachas ag fanacht ar chomhlachtaí reachtúla, chinn muid ár bhfeachtas tiomsaithe airgid féin a sheoladh chun an t-easnamh caipitiúil a shárú linn féin. Táimid thar a bheith buíoch as an dlúthpháirtíocht chineálta chroíúil agus an tacaíocht atá faighte againn ó réimse leathan daoine aonair agus eagraíochtaí tacaíochta a chuidigh linn an ócáid a eagrú. Cuirimid fáilte roimh aon tacaíocht agus gach tacaíocht a chuidíonn linn tionscadal Croí na Carraige a bhaint amach. Táimid ag súil le sibh a fheiceáil i Hurley’s Déardaoin 12 Márta!’
Le haghaidh tuilleadh eolais ar fheachtas tiomsaithe airgid Ghlór na Móna, déan teagmháil le Feargal Mac Ionnrachtaigh ag feargal@glornamona.com / +447841101630.
