Tá Féile na gCloigíní Gorma ar ais arís i mbliana agus spreagtha ag Teaghlaigh Chnoc na Foinse agus An Charraig Thiar
Leis na focal faire ‘Pobal, Dlúthpháirtíocht, Folláine’, labhair aoichainteoir idirnáisiúnta agus sóisialach Grace Blakeley ar ‘Existence is Resistance: Capitalism and How We Replace It’
Seoladh Féile na gCloigíní Gorma i Gael-Ionad Mhic Goill a bhí dubh le daoine ar an Aoine 8ú Bealtaine. Bhunaigh gníomhaithe áitiúla san Uachtar Chluanaí agus na ceantair máguaird Féile na gCloigíní Gorma in 2017 mar fhreagairt ar thréimhse gharbh na déine a d’fhág muintir na háite in ísle brí, ag athnascadh muintir na háite leis an timpeallacht galánta thart orainn, i measc bealaí eile chun dlúthpháirtíocht a léiriú leis an phobal. Bláthaíonn lear mór Cloigíní Gorma fiáine atá dúchasach de Pháirc Tua an tSléibhe Dhuibh achan Bhealtaine.
Dúirt eagraí na féile Nuala Ní Scolláin thar ceann an choiste:
“Sa 8 lá den fhéile, beidh imeachtaí ar siúl dotheaghlaigh agus do dhaoine de gach aois a bhfuil suim acu sa timpeallacht, an Ghaeilge, spórt, an tsláinte mheabhrach, stair, aclaíocht, ealaín, ceol, polaitíocht, cainteanna, scannánaíocht, drámaíocht agus go leor eile!
”Gach bliain tá borradh ag teacht ar an 8 lá speisialta seo leis na heochairfhocail Pobal, Dlúthpháirtíocht agus Folláine lárnach ann. Cuireann sé gliondar ar ár gcroíthe a fheiceáil go bhfuil níos mó agus níos mó den phobal áitiúil agus níos leithne rannpháirteach san fhéile. Ar a bharr sin, chonaic muid na toscaireachtaí idirnáisiúnta is mó ar an fhéile go dtí seo le cúpla bliain anuas.
“Ní bheadh ann don fhéile gan na pairtnéirí spreagúla a eagraíonn clár pacáilte gach bliain, agus áthas an domhain orainn go mbeidh ceardlann rannpháirteach ann lenár gcomrádaithe sa Script Úr don tSláinte Mheabhrach de chuid PPR, réimse d’imeachtaí le Fís an Phobail, agus beidh an togra spreagúil dírithe ar neamhspléachas an bhia ar ais le linn na féile, ‘Feirm an Phobail’ eagraithe ag Gairdín an Phobail. Le mana na dlúthpháirtíochta ag croílár Fhéile na gCloigíní Gorma, is príomhthéama é an frith- chiníochas i mbliana. Chuige sin, tá muid ar bís gur pairtnéireacht oifigiúil na Féile iad an feachtas Kind Economy arís, a éilíonn #TógAnCosc atá roimh iarrthóirí tearmainn a bheith ag obair sna 6 chontae, sa Lón Mór an Phobail bliantúil. Ar a bharr sin, aibhsíonn an fhéile i mbliana foréigean in éadan na mban atá ag méadú gach bliain in Éirinn. Ach go háirithe, is mór an onóir dúinn go seolfaidh na teaghlaigh spreagúla Chnoc na Foinse agus an Charraig Thiar an Fhéile agus go mbeidh siad chun tosaigh ar mhórshiúl na Féile i mbliana.”
D’fhreastail Lynda Sullivan, an gníomhaí timpeallachta spreagúil, ar sheoladh Fhéile na gCloigíní Gorma i nGael-Ionad Mhic Goill:
“Ag teacht anseo agus ag ceiliúradh na gCloigíní Gorma libh ar fad, tugann sé sin níos mó dom ná faoiseamh éadrom – tugann sé dóchas dom. Anseo, feicim an cuma a bheadh ar an todhchaí do gach duine, dá roghnóimis í, agus dá dtógfaimis í. Is cosúil gur áit an-dhorcha é an domhan faoi láthair – ag amharc ar an ardú cogaíochta ag cumhachtaí impiriúla, ag amharc ar an chinedíothú leanúnach i nGaza, ag amharc ar theacht chun cinn an fhaisisteachais agus an chiníochais, ar bhriseadh síos na haeráide, ar dhíothú speiceas ar scála ollmhór, ar ghéarchéim shóisialta agus shláinte mheabhrach mar gheall go ndiúltaítear do dhínit a lán daoine. Is liosta trom é seo.
“Ach in ainneoin seo ar fad – éirímid fós. Eagraímid fós, cuirimid síolta fós, ceiliúrann muid fós. Agus níl áit níos fearr chun an spiorad sin de chumhacht agus athléimneacht a fheiceáil beo agus bríomhar, ná díreach anseo. Tá neamhspléachas bia agus ceartas talún ag fás díreach taobh amuigh den doras, agus trasna an bhóthair i nGairdín an Phobail, agus sna hionaid uile ar fud an oileáin ina bhfuil pobail ag teacht le chéile chun fás agus foghlaim le chéile – ag gabháil seilbhe ar thalamh más gá, agus ag díchoilíniú ár bplátaí dinnéir.”
Is mór an onóir ag an Fhéile go raibh Natasha Butler ag labhairt ag an seoladh thar ceann teaghlaigh Chnoc na Foinse agus an Charraig Thiar:
“Ar feadh 50 bliain, ní hamháin gur baineadh ár ngaolta uainn—rinneadh éagóir orthu, rinneadh mífhaisnéis orthu, agus diúltaíodh a ndínit dóibh. Níor chríochnaigh an phian sin an oíche sin. Mhair sí ar aghaidh in achan clann, in achan teach, in achan bliain ina dhiaidh sin.
“Rinne Arm na Breataine iarracht eagla a chur ar ár bpobal. Rinne siad iarracht muid a chur inár dtost. Rinne siad iarracht an fhírinne a chuir i gcré. Ach theip orthu. Óir is é é spiorad Iarthar Bhéal Feirste an rud nach dtig leo a bhriseadh go deo.
“Is é an pobal seo—gnáthdhaoine, teaghlaigh a bhí ag caoineadh, comharsana ag seasamh gualainn ar ghualainn—nach ligfeadh do na bréaga sin seasamh. Daoine a d’iompair an phian mar misneach. Daoine a sheas an fód, arís is arís eile, in éadan bhunaíocht an-chumhachtach.
“Beidh ómós againn dár muintir i gcónaí. Beidh siad i gcónaí linn. Agus leanfaimid muid orainn ag seasamh an fóid—ní amháin ar a son ár muintir, ach ar son achan teaghlach atá go fóill ar lorg fírinne agus ceartais.
“Mar tá a fhios ag an phobal seo cad is ciall le fulaingt.
Agus níos tábhachtaí arís—tá a fhios ag an phobal seo cad is ciall le hÉirímis.”
Chun tuilleadh eolais a fháil ar Fhéile na gCloigíní Gorma, déan teagmháil le nuala@glornamona.com agus lean an fhéile ar na meáin shóisialta.
